ارقد تهني شيل كل احزانك
صدقني لغيرك ما يكون مكانك
شيل كل اهمومك
ارقد تهنى دوم طيـّب نومك
راك يا عزيز عزيز غالي سومك
و فوق ما تصـّور راك عالي شانك
انت بحر و نا ادمنته عومك
و نحس في موجك ابكل حنانك
راني عشقتك حط في معلومك
و ما انسيبك مهما ايدور زمانك
يا عزيز تهنى
غيرك مكانك ما يقـّرب منه
هناك يا الغالي حد ما نتمنى
و هنايا ايكون افساعة اطمائنانك
خلك اقريب يا عزيز ادنى
ارويت ابغلاك اليوم نا مليانك
انت في وطاتي يا الغالي جنه
وما يطيب نومي غير وسط اجنانك
يا عزيز ارتاح
غلاك مو معقب داخلي مطراح
فيك النظر ينظر مسا و صباح
و الوذن ما تسمع امفيت الحانك
و نشمه عبيرك دوم في الارياح
و لي السان ما عنده الا امدحانك
نضايق انجيك و ناجده البراح
و نلقاك باهي يا زهر بألوانك
حبك اجتاحه خاطري اجتياح
من قالك غالي عليا مانك
ما يجي مكانك غيرك
ولا نرتوي من بير خاطي بيرك
انظر اعيوني تعرفه تأثيرك
و تحس بيه القلب ها اللي صانك
نثرت ابغلاك علي كل عبيرك
من كل زهرة حب من بستانك
دللتني بالحيل كثر خيرك
موحال ردي لك هو نسيانك
و موحال شي مره قديم انديرك
ارتاح و اطلقله غلاي عنانك
