سندريلا بالنسخة الليبية ....!! ^_^

السلام عليكم ورحمة الله وبركاته


كل عام وأنت بخير ..وكل سنة وأنتم طيبين ......


معيدين فايزين ........موضوع خاص ....بفرحة العيد ......

المهم

كان يا مكان في سالف العصر والأوان كانت فيه عزوزة اسمها تافيدة

كانت عمرها 56 عام في عمر الزهور كانت مرت بوها عصبية

تعصب على اتفه الاسباب مرة من المرات الحاجة تافيدة نست توكل الدجاج

مرت بوها قريب قتلتها و مع هذا كله شغل الحوش كله فوق دماغها

و خواتها الاتنين من مرت بوها خيرية و فتحية ما يديرو في شيء

المهم كان فيه امير يحكم الشارع الي تسكن فيه تافيدة و كان عنده ولد اسمه الحاج برعي

ولي العرش للشارع يوم من الايام كان الحاج برعي فايت بي البيجو متع بوه وهوا

فايت شاف الحاجة تافيدة تسيق امام حوشهم انعجب بيها قعد يعفس

على الفرينو السيارة شي قالت نوقف بعد ما خشت تافيدة السيارة تصكرو الفرينات متعها

وقفت نزل برعي لكن ما عرف الحوش من يومها ما يفكر الا في تافيدة

الامير ابو الحاج برعي قاله يا ولدي لازم نزوجوك تو نقول لي امك تعزم بنات

الشارع كلهم على اساس تاليف جدك الله يرحمة و توازيلك بنت الحلال

المهم الشارع كله سمع و جي اليوم و اكيد مرت بو تافيدة بتمشي و بترفع بناتها

خيرية و فتحية و تافيدة قالت بنمشي لكن مرت بوها قتلها و ين يا حنة وراك غسيل

حوايج و حلب البقرة اقعدي و فعلا قعدت تافيدة في الحوش و مشو كلهم


فجـأة تطلع عفريتة امام تافيدة و قتلها يا تفيدة بنساعدك لانك نيتك

صافية و دارت حركة مش مفهومة خت فت

انحلبت البقرة و الحوايج انتشرو فوق الحبل و لكن قعدت مشكلة

الفراشية الحاجة تافيدة ما عندها فراشية العفريتة جابتلها وحدة

و قتلها لازم تروحي بكري الساعة 3 لازم تكوني في الحوش قتلها باهي

لكن كيف بنمشي قتلها العفريتة قصي مع الشوارع شنو تحسابي روحك سندريله

نجيبلك قرعة و فيران و نحولهم لي سيارة توكلي سلم بنتي

و فعلا مشت تافيدة

المهم النساوين كلهم انعجبو فيها مع انه ما يبان شيء الا عينها من الفراشية

و جت الساعة تلاته تافيدة تفكرت طول لبست الشبشب و طلعت مع الباب

و هيا طالعة شافها الحاج برعي عرفها انها الي حبها قلبه

قعد ينادي فيها دارت روحها حولة و جري في جرتها علق عليها

في الزنقة شدها مع الفراشية اتنحت الفراشية و تافيدة جرت و هربت للحوش

و قعدت الفراشية مع الحاج برعي و لد شارع الحاج برعي قالة قبل

و اني صغير شفت ريسوم اسمها سنديرلة قريبه من قصتك الامير في

قصة سندريلة خدي الحداء و بدي يقيس فيه على بنات القرية علاش

انت ما ادير زية و تاخد امك و معاك الفراشية و تقيسها على بنات

الشارع و فعلا سمع كلام صاحبة و رفع امه و قعدو يدورو لين وصلو حوش

تافيدة و جو خواتها من مرت بوها و قاسو الفراشية ما جت على حد و مرت

بو تافيدة قتلهم خلاص معاد عندي بنات قالو باهي و هما طالعين

شافو تافيدة توكل في الدجاج جت ام الحاج برعي و قتلها قيسي الفراشية يا بنيتي

و فعلا جت عليها طق رشق

و تزوج الحاج برعي من تافيدة و عاشو في رخاء و سعادة


ودمتم بود

ههههههههههه شكرااااااااااا

ههههههه ابداع يا مان